India's largestHyperlocal short
news App
Get daily news updates that are tailored for you based on your preferred language & location.
download Way2News app now
News July 5, 2024
కేజ్రీవాల్ బెయిల్ పిటిషన్‌పై విచారణ 17కు వాయిదా
ఢిల్లీ సీఎం కేజ్రీవాల్ బెయిల్ పిటిషన్‌పై ఇవాళ హైకోర్టులో విచారణ సాగింది. వీటిపై కౌంటర్ దాఖలు చేయాలని సీబీఐకి న్యాయమూర్తి నోటీసులు ఇచ్చారు. తదుపరి విచారణను ఈ నెల 17కు వాయిదా వేశారు. దర్యాప్తు ముసుగులో సీబీఐ తనను వేధిస్తోందని కేజ్రీవాల్ పిటిషన్‌లో పేర్కొన్నారు. తనను అరెస్టు చేయడం చట్టవిరుద్ధమని చెప్పారు.
News July 5, 2024
ప్రభాస్ ‘రాజాసాబ్’ సినిమాపై ఆ వార్తలు ఫేక్: నిర్మాణ సంస్థ
ప్రభాస్ హీరోగా తెరకెక్కుతున్న ‘రాజాసాబ్’ మూవీకి ఆడిషన్స్ నిర్వహిస్తున్నట్లు వస్తున్న వార్తలను నిర్మాణ సంస్థ ఖండించింది. ‘ఇలాంటి తప్పుడు సమాచారాన్ని ప్రోత్సహించొద్దు. ఏదైనా ఉంటే మేమే అధికారికంగా ప్రకటిస్తాం’ అని పీపుల్స్ మీడియా ఫ్యాక్టరీ ఓ నోట్ విడుదల చేసింది. మారుతి దర్శకత్వం వహిస్తున్న ఈ సినిమాలో నిధి అగర్వాల్, రిద్ధి కుమార్, మాళవికా హీరోయిన్లుగా నటిస్తున్నారు. తమన్ మ్యూజిక్ అందిస్తున్నారు.
News July 5, 2024
పవన్.. కాపులకు 5% రిజర్వేషన్ అమలు చేయండి: హరి రామజోగయ్య
AP: డిప్యూటీ సీఎం పవన్ కళ్యాణ్‌కు కాపు నేత హరి రామజోగయ్య లేఖ రాశారు. ‘మీ హయాంలో అభివృద్ధి, సంక్షేమం పరుగులు పెట్టిస్తారని ఆశిస్తున్నా. కాపులకు 5 శాతం రిజర్వేషన్లు అమలు చేయాలి. కృష్ణా జిల్లాకు వంగవీటి మోహనరంగ పేరు పెట్టాలి. మీరు సినిమాలు, పాలనకు సమానంగా సమయం కేటాయించాలి. జిల్లా, మండల పరిషత్, పంచాయతీ వ్యవస్థలను బలోపేతం చేయాలి’ అని కోరారు.
News July 5, 2024
సమంత పోస్ట్‌పై డాక్టర్ల ఫైర్.. ఖండించిన హీరో
సాధారణ వైరల్ ఇన్ఫెక్షన్ వచ్చినవారు ఇంట్లోనే హైడ్రోజన్-పెరాక్సైడ్‌ను పీల్చితే సరిపోతుందని హీరోయిన్ సమంత సలహా ఇచ్చారు. అయితే ఆ సలహా తప్పని, ఇలా చేస్తే చనిపోయే అవకాశం ఉందని వైద్యులు హెచ్చరిస్తున్నారు. ప్రజారోగ్యానికి హాని కలిగించేలా చేయడం నేరమంటూ మండిపడుతున్నారు. కాగా ‘సమంత పోస్ట్‌లో ట్యాగ్ చేసిన డాక్టర్‌తో మీరు వాదిస్తే బాగుండేది’ అని ఓ డాక్టర్ చేసిన ట్వీట్‌కు హీరో రాహుల్ రవీంద్రన్ కౌంటర్ ఇచ్చారు.
News July 5, 2024
7, 8 తేదీల్లో భారీ వర్షాలు
TG: ఈ నెల 7, 8 తేదీల్లో రాష్ట్రవ్యాప్తంగా పలు జిల్లాల్లో భారీగా వర్షాలు కురవొచ్చని వాతావరణ శాఖ తెలిపింది. భద్రాద్రి కొత్తగూడెం, ఖమ్మం, నల్గొండ, సూర్యాపేట, నాగర్‌ కర్నూల్, వనపర్తి జిల్లాల్లో 7న, మంచిర్యాల, కరీంనగర్, పెద్దపల్లి, జయశంకర్ భూపాలపల్లి, ములుగు, మహబూబాబాద్, వరంగల్, హనుమకొండ, జనగామ జిల్లాల్లో 8న వర్షపాతం ఉంటుందని పేర్కొంది. మిగిలిన జిల్లాల్లోనూ చెదురుమదురుగా వర్షాలు పడొచ్చని అంచనా వేసింది.
News July 5, 2024
QR కోడ్‌తో విద్యుత్ బిల్లు చెల్లింపులు
TG: విద్యుత్ బిల్లుల చెల్లింపుల్లో కొత్తగా QR కోడ్ విధానాన్ని ఉత్తర తెలంగాణ విద్యుత్ పంపిణీ సంస్థ తీసుకొచ్చింది. రీడింగ్ తీశాక వచ్చే బిల్లు కిందే QR కోడ్ ఉంటుంది. వినియోగదారులు ఫోన్‌లో దీనిని స్కాన్ చేసి డెబిట్, క్రెడిట్ కార్డులు, UPI, నెట్ బ్యాంకింగ్ ద్వారా చెల్లించవచ్చు. ప్రస్తుతం కొన్ని ప్రాంతాల్లో అమల్లోకి రాగా.. త్వరలో అన్ని జిల్లాల్లో QR కోడ్ బిల్లులు రానున్నాయి.
News July 5, 2024
OTTలోకి వచ్చేసిన మీర్జాపూర్-3
పాపులర్ వెబ్ సిరీస్ మీర్జాపూర్-3 అమెజాన్ ప్రైమ్‌లో స్ట్రీమింగ్ అవుతోంది. మొత్తం 10 ఎపిసోడ్లను ఒకేసారి రిలీజ్ చేశారు. తెలుగు సహా అన్ని భాషల్లో సిరీస్ అందుబాటులో ఉంది. రెండో సీజన్‌లో మున్నా(దివ్యేందు శర్మ)ను అంతం చేసి మీర్జాపూర్‌ను గుడ్డు(అలీ ఫజల్) సొంతం చేసుకుంటారు. దాన్ని గుడ్డు ఎలా పాలిస్తారు? అతడిని చంపి మీర్జాపూర్‌ను దక్కించుకోవడానికి లోకల్ గ్యాంగ్స్ చేసే ప్రయత్నాలను పార్ట్-3లో చూపించారు.
News July 5, 2024
HYDలో కాల్పులు జరిపిన పోలీసులు
హైదరాబాద్ పెద్దఅంబర్‌పేట వద్ద నల్గొండ సీసీఎస్ పోలీసులు కాల్పులు జరిపారు. ఔట్ రింగ్ రోడ్డు వద్ద దోపిడీ దొంగలను పట్టుకునే క్రమంలో వారు దాడికి తెగబడటంతో పోలీసులు గాల్లోకి తుపాకులు కాల్చారు. అనంతరం నలుగురు సభ్యుల దొంగల ముఠాను అదుపులోకి తీసుకున్నారు.
News July 5, 2024
రిషి సునాక్ పార్టీ ఘోర ఓటమి..
బ్రిటన్ ఎన్నికల్లో లేబర్ పార్టీ ఘన విజయం సాధించింది. మ్యాజిక్ ఫిగర్‌(326)ను దాటి 364 సీట్లను కైవసం చేసుకుంది. ప్రధాని రిషి సునాక్ నేతృత్వంలోని కన్జర్వేటివ్ పార్టీ 77 సీట్లు, లిబరల్ డెమొక్రాట్స్ 48 సీట్లలో గెలిచింది. మరిన్ని ఫలితాలు వెల్లడి కావాల్సి ఉంది. ఓటమికి తనదే బాధ్యతని సునాక్ వెల్లడించారు. లేబర్ పార్టీ నేత కైర్ స్టార్మర్‌కు ఫోన్ చేసి అభినందించారు. ఇవాళే అధికార మార్పిడి జరుగుతుందన్నారు.
News July 5, 2024
ఆస్పత్రుల మ్యాపింగ్‌కు ప్రభుత్వం శ్రీకారం
TG: ప్రజలకు అత్యవసర వైద్య సేవలు అందేలా ప్రభుత్వ ఆసుపత్రులను వైద్య, ఆరోగ్య శాఖ మ్యాపింగ్ చేయనుంది. ప్రతి 30కి.మీ పరిధిలో ఎమర్జెన్సీ సేవలు అందించే ప్రభుత్వ ఆసుపత్రి ఉండేలా చర్యలు చేపట్టింది. అత్యవసర వైద్య సేవలు పొందడంలో ప్రజలు పడుతున్న ఇబ్బందులను ఇటీవల ప్రాథమికంగా గుర్తించింది. ఏ గ్రామానికి ఏ వైద్య వసతి ఎంత దూరంలో ఉందో గుర్తించడంతో పాటు ఆసుపత్రిలో వసతులను మ్యాపింగ్‌లో రికార్డు చేస్తోంది.
Featured News
Sorry, no posts matched your criteria.